無論你係一個幾好嘅女友都好，有3件最忌的事，身為女友是必須知道的！因為一旦「觸犯」，可能會影響彼此的關係：
1. 胡思亂想症
唔知點解，有不少女生遇上男友miss call，都會有好多嘢諗：佢係咪同緊女仔一齊？定係同班friend飲緊酒？係咪特登唔聽我電話呀！越諗就越多一啲自己平時擔心或唔鍾意男友做嘅事。
到男友接電話時，第一句就用質疑的態度問：做咩你唔聽我電話呀！？無論男友答乜，都總係唔信。其實咁樣男生會覺得好無奈、好困擾同好煩！
試諗吓，人人都會有miss call嘅時候啦！開會、環境太嘈、電話靜音後忘記開返聲，自己都試過，right？如果男友無乜異樣，有合理解釋，就唔好胡思亂想喇！反而問吓自己，點解咁驚佢同女仔一齊？點解覺得男友要呃你？對男友那麼不信任，原因係咩？
2. 帶你見friend時黑面
有朋友曾經話，帶女友見朋友時，女友因為其他人都是女生而全程黑面！其實咁樣蝕底的是自己！男人都愛面子，你咁樣除咗令佢覺得無面，仲好尷尬！試諗諗，如果你係你男友，下次仲會唔會帶個黑面女友見朋友？咁樣只會令你少咗認識佢嘅朋友的機會。
仲有，如果一齊見朋友前，男友有啲事激嬲咗你，但當他的朋友一到，請你暫且放低戰幔，有咩都等得你兩個人時再解決！一來唔會被佢啲朋友覺得你唔大方，二來男友見你懂得顧全大局，話唔定之後會主動氹返你！平時男友點就你都好，在他的朋友面前，做女友的要識做，幫他建立良好的自我形象。做少一陣「女王」不會影響你的女王地位嘅。
3. 愛你變成「鵝」你
男最怕煩，如果你好似佢阿媽咁日「鵝」夜「鵝」，佢都唔知當你係阿媽好定女友好！
例如：「呢啲唔健康呀！仲食！」又或者：「嗱！係咪呢！都叫咗你早啲瞓啦！而家無晒精神，你返工點做嘢呀？」
而箇中最敏感的，是將關心和將來、金錢拉埋一齊講，最常見的例句有：「食呢啲又貴又無益，你今個月已經買咗咩咩咩，儲唔到錢……」下刪一百句咁樣會買唔到樓、結唔到婚等恐嚇字眼。有很多女生都以擁有「收支精明眼」為傲，只要你甘於做管家婆，亦不怕嚇親男人……最大問題係，拍拖啫，唔使連同個人一時口福、小小玩樂都放大到人生大事的層面，還要事事對你、對將來個家負責任吧！
呢一類阿媽式的教訓或關心，其實男並唔受落，要表達你嘅愛同關心，可以用軟功，溫柔地說：「呢啲食得多好似唔係咁健康，不如下次食少啲！」又或者：「不如我哋一齊食少啲吖？」
